Valtion museoista merilis-, kuljetus- ja puolustushistuurialle
Valtion museot meri, kuljetus- ja puolustushistuurialle (SMMTF) oon valtiolinen virasto jonka tehtävä oon ette säilyttää ja kehittää kulttuuriperintöä ja etistää ja rakentaa tietoa omila aloila. Toiminta pittää olla koko yhtheiskunnan ihmisitten asia.
SMMTF vettää ja kehittää seittemän museota neljässä paikassa.
Armeamuseo Stokholmissa kuvvaa Ruottin histuuriata 1500-luvulta nykyaikhaan, jossako fuukkys oon kunka sota ja konfliktit oon vaikuttanheet ihmishiin.
Webbipaikka: Armemuseum.se
Lentoasemuseo Linköpinkissä oon tekniikki- ja kulttuurihistuurinen museo jossako oon ynikki kokoelma militäärilentokonheita, henkilökertomuksia ja esihneitä jokka kuvvaavat reisua lennon piunääriaijasta nykyaijan JAS-konheishiin.
Webbipaikka: Flygvapenmuseum.se
Rautatiemuseo Gävlessä oon Ruottin kansalinen rautatiemuseo ja kertoo ruottalaisen rautatien histuurian.
Webbipaikka: Jarnvagsmuseet.se
Merimuseo mailmanperintökaupunkissa Karlskronassa oon Ruottin kansalinen museo ruottalaisen meripuolustuksen histuuriasta – suurvallasta tähhään päihvään.
Webbipaikka: Marinmuseum.se
Merihistuurilinen museo Stokholmissa oon museo koko perheele. Siinä oon näyttelyitä ihmisen suhtheesta merheen, järhveen ja rannikhoon läpi histuurian.
Webbipaikka: Sjohistoriska.se
Vasamuseo Stokholmissa oon yks Skantinaavian museoista jossako oon enniiten käviöitä. Täälä oon ynikki hyvinsäilytetty sotalaiva Vasa vuelta 1628.
Webbipaikka: Vasamuseet.se
Vrak – Museum of Wrecks Stokholmissa nostaa kertomuksia Itämeren mailmanynikistä kulttuuriperinöistä pinnale.
Webbipaikka: Vrak.se
Sitäpaitti kuuluvat sivililentokokoelmat ja tie- ja trafikkihistuuriset kokoelmat Kjula:ssa SMMTF:hiin.
Virasthoon kuuluu kansa Puolustuksen perinelautakunta, eksperttiryhmä joka neuvoo puolustusperintheistä, esimerkiksi faanoista ja stantaarista, metalista, heraltisista ashesita ja yniformunimityksistä.
SMMTF tekkee yhtheistyötä ja antaa neuvoja rekiunaalile ja paikalisille museoile, iteällile föreninkille, eri organisasuunile ja privattihenkilöile. Virasto arvioittee kultuurihistuurisia arvoja laivoissa ja vapa-aikavenheissä, ja jakkaa avustusta laivoile jokka oon erityisen tärkeitä kulttuuriperinölle. SMMTF tukkee Ruottin militäärihistuurista perintöä, verkosto puolustushistuurisista museoista ympäri maata.
Tutkinto oon luonolinen ja intekreerattu osa SMMTF:issä. Tutkintoa tehhään olletikki aihneissa jokka oon liittynheet viraston toiminthaan ja useasti yhtheistyössä eri yniversiteetitten kansa. Tutkintotulokset tehhään saataviksi erilä laila, muun muassa museoitten näyttelyissä. SMMTF:ilä oon yhtheistyössä Stokholmin yniversiteetin kansa, Keskusta merilistutkimuksille (SEMAS), tutkintokeskusta jollako oon fuukkys merilishistuurihaan, etnolokiihiin ja arkeolokiihiin.
SMMTF oon miljöösertifieerattu ISO 14001 mukhaan.